Čuovgga urbi čuvggodahttá skábmaáiggi

Go skábma joavdá, seavdnjat njielasta máŋgasa. Čuovgga urbi -lávlla goittot cahkkeha čuovgga aiddo seavdnjadamos áigge ja giessá olbmo litna gokčasa sisa. Lávlla lea álgoálggus dahkkon juovlalávllan, muhto dat heive maid áigái, goas olbmo miella lea sevnnjodan. Dat muitala das, mo seavdnjadamos áiggege lea doaivva jorggáldagas ja mo buot goittotge fas čuvggoda.

Lávlla álgá sániiguin “Go čuovgga urbi luotkana/Seavdnjada fápmu boatkana/Skápma gietkama searrobáttit/Dálvejorggáldahkan ložžet”.

Lávlaga sániid lea čállán Inger-Mari Aikio ja šuoŋa Ánnámáret. Solistan gullat nuorra anárlačča Káren Maria Näkkäläjärvi ja fárus juoigá maid Ánnámáret. Lávlaga lea buvttadan ja miksen jietnadáiddár ja musihkkár Miro Mantere. Son lea maid heivehan bihtá ovttas Otto Eskelinen -nammasaš musihkkáriin. Bihtá lea mastereren Henkka Niemistö. Čuojaheaddjin leat Miro Mantere, Otto Eskelinen ja Kalle Miettinen.

Káren Maria Näkkäläjärvi, govva Karoliina Juhola

Čuovgga urbi almmuhuvvo digitála stream-bálvalusain skábmamánu 14. beaivve 2025 ja maiddái Oulu bismagotti Youtube-kanálas: https://www.youtube.com/channel/UC97JsRzeuitp90xKfCOe7xQ.

Lávlla lea ovdal almmustuvvan Čábbámus juovlalávlagat -gihppagis 2022. Dál dat oažžu vuosttas geardde čuoddji hámi. Lávlla ovttastahttá ođđaáigásaš musihka Ánnámáreha luđiin, mii dahká das fámolaš ollisvuođa.

Lávlaga dahkama leat dorjon Oulu bismagotti duopmokapihttal, Suoma Sámedikki Sámemusihkkaguovddáš ja dan almmuha DAT.

Lasi dieđut

Inger-Mari Aikio tlf. +358 40 5961109, imaaikio@yahoo.com

Anna Näkkäläjärvi-Länsman tlf. +358 40 5405985, anna@annamaret.fi

DAT, Ol-Johan Gaup tlf. +47 977 34 966, guo@dat.net